لمسات شرقية لبيت عصري

بتجهزي شقتك ونفسك تكون على الطريقة العصرية من حيث ألوان الدهانات والأرضيات وطريقة الفرش وفي نفس الوقت نفسك تحافظي على الروح الشرقية الأصيلة فيها علشان تبان وكأنها تحفة فنية فريدة من نوعها

يبقى مفيش قدامك حل غير إنك تقري الحوار الجامد ده مع مهندسة الديكور
الدكتورة / حنان كريمة – أستاذ التصميم الداخلي بجامعة حلوان...

علشان تعرفي كل اللي أنت عايزاه

نشوف الحوار مع بعض

في البداية عايزين نعرف إيه هي ألوان الدهانات اللي بتساعد على توسيع الغرف الضيقة؟!

معظم شقق الشباب دلوقتي مساحتها ضيقة سواء داخل القاهرة أو في المدن الجديدة, وبالتأكيد كل الدهانات الموجودة في الأسواق وعند كل شركات الدهانات المــعــروفــة زي (ناشيونال, سكيب) بتقدم للشباب نوعية من الدهانات والألوان بتعمل على توسيع الغرف والشقة عموماً، والدهانات التي تحتوي على لمعة شديدة بتعطي اتساعا أكثر غير الألوان الغامقة حتى إن الألوان الفاتحة دلوقتي بيوضع عليها خامات جديدة بتساعد على جمالها ومعظم الدهانات التي تحتوي على انعكاسات ضوئية وألوانها زي الفضي والذهبي والأوكسديه والبرونزي بتستخدم في المساحات الضيقة.

فيه بنات بتحب أكثر من لون داخل الغرفة الواحدة؟!

أنا ضد تعددية الألوان وأفضل لون واحد داخل الغرفة الواحدة، وممكن تغيري اللون من غرفة إلى غرفة وعلى فكرة معظم الدهانات دلوقتي بيوضع عليها دهان آخر شفاف بيعطي جمالا لأي لون وده بيستخدم أكثر في دهان الطرقات وغرف المعيشة وغرف الأطفال.

وهل لون السقف بيختلف عن لون الجدران؟!

أنا أفضل السقف الفاتح الملون بلون الكريمي أو الأوف وايت وده لأن السقف الفاتح بيساعد أكثر على الإحساس باتساع الغرفة بالإضافة إلى الأرضيات الفاتحة مثل الجراي والبراون والدرجات (المتربة) موضة جداً.

وهل نوعية الدهانات تختلف من غرفة لغرفة؟!

أنا أفضل إن دهان غرفه المعيشة يكون مختلفا عن غرفة الأنتريه والنوم، وأقترح مثلا إننا نستخدم الدهانات الخشنة مع غرف المعيشة لأنها مناسبة أكتر، أما دهانات (الماربل) التي تعطي إحساس الرخام ويطلق عليها دهانات ناعمة فدي بتناسب أكثر الصالونات وغرف النوم.

إيه أكثر حاجة موضة دلوقتي "السيراميك أم الباركيه"؟!

الأرضيات عموماً تنقسم إلى (باركيه – رخام – HDF ) و"الخشب" الطبيعي هو "الباركيه" أم HDF" " هي نوعية من الأرضيات تنتقل من مكان إلى مكان ومستحبة جداً في غرف المعيشة والنوم والريسبشن، أما "السيراميك" فهو خامة مرتبطة بالحمامات ولا أفضل السيراميك في الريسبشن وممكن استبدال السيراميك بالرخام ودلوقتي فيه أنواع من الرخام رخيصة وتناسب الطبقات المتوسطة زي "الرخام المصري" بيكون رخيص، وأنا أفضل تطعيم الرخام بلونين مع بعض بالإضافة إلى رسومات في المنتصف أو على الجانبين والآن يوجد ماكينة الرخام بتساعد على صناعة أشكال مختلفة وبتعمل تقنية عالية في أعمال الرخام، أما بالنسبة لغرف النوم فأفضل "الباركيه" أو ""HDF .

ممكن تعرفينا أكتر على HDF ؟!

هو عبارة عن أرضية جاهزة متقطعة من خشب صناعي HDF متعشق مع بعض وبيكون سهل انتقاله من مكان إلى مكان ومن غرفة إلى أخرى وهو أيضاً خشب مسامي مضغوط ولا يوجد به مادة لاصقة وبه مسام كثيرة ومعرض لشرب المياه، لذلك أنصح بتلميعه بقطعة مبللة ومعصورة جيداً والشركة بتكون مسئولة عن تنسيقه ووضعه داخل الشقة بس عيبه الوحيد إنه معرض للتجريح لذلك أنصح ست البيت بالعناية والحذر أثناء نقل وتحريك الأثاث من فوقه. وعلى فكرة ده موجود بأسعار تناسب جميع المستويات.

إيه أفضل الأرضيات المناسبة لغرفة المعيشة؟!

أفضل في غرفة المعيشة بالذات "الرخام الأنتيك" وده كان يدق باليد والأزميل، لكن الآن أصبح يضاف إليه مواد كيماوية حمضية بتعطي للرخام الإحساس بالحجر وميزته إنه فيه ألوان كثيرة زي البني والبيجات، أما الموكيت فهو غير مرغوب فيه تماماً لأنه بيساعد على تكوين حشرات صغيرة غير مرئية بتسبب حساسية.

وإيه طرق التنظيف اللى بتساعد على الحفاظ على الخشب سواء الأثاث أو الأرضيات؟!

أنا أحذر كل البنات من استخدام المنظفات التي تحتوي على شحوم أو اسبراي التنظيف لأنه بمرور الوقت بيساعد على تلف الأخشاب بكل أنواعها سواء أرضيات أو أثاث علشان كده أنصح باستخدام فوطة مبللة جيداً أو (جلانس) الخاص بتلميع الزجاج.

إيه الأشكال الحديثة في الأثاث؟!

أنا متخصصة في المزج بين المودرن والشرقي في معظم وحدات الأثاث وأنا أفضل أشكال الخشب "الإستريت لاينس" ويضاف إليه جزء فني زي مربع فيه دق يعبر عن الفن الشرقي زي "دق الأويما"،"موتيفا النحاس"، الطباعة على الخشب بالإضافة إلى إن تطعيم الجلد مع الخشب سواء في الأنتريه أو السفرة أصبح موضة جداً وأنواع الجلد بتكون (جلد بقر – جلد تمساح – جلد طبيعي أو صناعي) وألوان الجلد بتكون أوكسدية أو فضي،إذن فالشكل العام بيكون مودرن لكن يضاف إليه لمسات تعطي شكل الشرقية والطراز.

هل المرايات المتداخلة في الأثاث.... موضة دلوقتي؟!

استخدام المرايات في العموم موضة لكن المرايات الفاميه والمتقطعة إلى أجزاء والمشطوفة موضة جداً وبالمناسبة المرايات الفضي لم تعد موضة وأنا شخصيا أفضل المرايات كقطعة ويكون مثل: الكونسول والمرايات المتداخلة مع نيش السفرة ودولاب غرف النوم.

وإيه شكل غرفة السفرة الحديثة دلوقتي؟!

اختيار غرفة السفرة بيتوقف على حسب الفراغ ولو الفراغ من مربع تصلح سفرة مربعة بحوالي ثمانية كراسي ولو يوجد دائرة في السقف أعمل ترابيزة مدورة بست كراسي. ومن الأفكار الموضة دلوقتي الضلع (البانكيت) وهو عبارة عن (بانكيت) خشب بدون ظهر وهذا عند أضلاع معينة من كراسي السفرة وليست كلها... أما بالنسبة للألوان فالخشب البني الغامق مع الإكسسوار الفضي والأوكسدية أو الذهبي موضة جداً، أما التنجيد يكون جلد بجميع أنواعه بدلا من القماش، وبالنسبة للنيش فالقطعة الواحدة أصبح موضة دلوقتي ولو المساحة كبيرة أصمم تصميم مودرن منفصل عن النيش يوحي بشكل السفرة.

والقماش السادة أحسن ولا المنقوش... بالنسبة للأنتريهات؟!

الأنتريه الجلد موضة والقماش الذي يعطي تأثير الجلد موضة جداً بالإضافة إلى القماش القطيفة والشانيل كلهم موضة ولكن لا أفضل القطن لأنه مش مصبوغ بعناية ومعرض لإذابة لونه بمرور الوقت مع الغسيل أما بالنسبة لألوان الأقمشة فأفضل أن الأنتريه يكون سادة أو ميكس مع لونين مع بعض بالكثير ولكن أفضل الخدوديات تكون منقوشة مثل المقلمات والدوائر وأشكال أخرى ملونة وده ينطبق على جميع أشكال الأنتريهات الإستيل والمودرن وحسب أذواق البنات.

وإيه الأقمشة الحديثة للستاير دلوقتي؟!

الستارة الحديثة عبارة عن جانبين جنب تلتين وجنب تلت بالإضافة إلى شكل البوكيه في الستارة مع التطعيم بقماش سادة، أما الأقمشة فالأورجنزا والقطن الذي يحتوي على فتلة لامعة موضة جداً. أما بالنسبة للألوان فهناك الفضي والبيج والأوكسيديه والألوان الدافئة عموماً.

إزاي أختار الإضاءة المناسبة والحديثة للشقة؟!

أنا بأعتبر إن الإضاءة شيء مهم جداً ومهما كان التصميم جميل وبسيط لكن لو افتقد للإضاءة بيضيع حوالي 40% من الجمال... وفي العموم أنا أفضل إن مصدر الإضاءة يكون مختفي فممكن أعمل أسقف صناعية لأن ميزة السقوف أنها تحتوي على إنارة غير مباشرة لا تعلم مصدرها ولكن بتساعد على إنارة المكان المـتـواجدة فيه وأخـفي بـهــا (التيوب لايت) وهو عبارة عن إضاءة أمبوبية بها ألوان مختلفة وبتكون داخل السقف الساقط. أما غرف المكتب يكفي جداً أباجورة أو ديسك لايت. أما المطبخ بيكون به وحدات إضاءة ضاربة على وحدات المطبخ المختلفة ومثلاً في النيش أضع إضاءة كعرض للكريستالات غير مرئية وأفضل النجف المدلي المركز على الترابيزة أو الوحدة بأنواعها المختلفة مثل الميتال, والوايرس, والفضي، أما بالنسبة للترابيزات فهي بتكون عموماً منخفضة وارتفاعها لا يتعدى الــ 25 سم وأفضل الإضاءة تكون عليها مركزة.... إذن الإضاءة غير المباشرة في أماكن متفرقة من الشقة تعتبر موضة جداً في حين تراجعت إنارة الأسبوت بشكل كبير في الفترات الأخيرة.

إيه الأفكار الجديدة من الديكورات والإكسسوارات اللي بتساعد على تغيير شكل الشقة؟!

فيه أفكار كتير ممكن نعملها زي مثلا...

• لو الشقة مودرن أفضل وجود فازات فضي أو إستانلس وأطعم غرف المعيشة بفازات زجاج كبيرة بها بولات زجاج كبيرة ونضع بها خرز ملون وأفضل أن يكون لون الإكسسوار من نفس لون الغرفة.

• كمان أقترح الزرع الصناعي وخاصة أشكال شجر الموز بأوراقه الكبيرة مع وجود تابلوهات تجريدية أو تابلوهات من لون الفرش وممكن استبدال التابلوهات بأرفف من الخشب الطبيعي على الجدران وأضع بها وحدات من الإكسسوار والأنتيك.

• أضع خداديات متناثرة في المكان ومطعمة بالترتر والصدف وعلى فكرة ممكن يصل عرض الخددية إلى 75 × 75 سم.

• ممكن كمان أطعم البيت بالزلط الملون لأنه يعطي إحساس بالطبيعة داخل البيت وممكن أعمل ميكس من الرخام والخشب.

• ممكن أستغل عمود وسط الغرفة وأحوله إلى مكتبة متحركة؛ الجزء الأمامي منها كتب والجزء الخلفي أضع التليفزيون والدش والفيديو.